ប្រែសម្រួលជាខេមរភាសាដោយ លី សុខណា

ដើម្បីជំរុញនវានុវត្តន៍ និងការច្នៃប្រឌិតរបស់និស្សិតកម្ពុជា ការដាក់បញ្ចូលវិទ្យាសាស្ត្រ បច្ចេកវិទ្យា វិស្វកម្ម គណិតវិទ្យា (STEM) ទៅក្នុងការអប់រំគឺជាគន្លឹះសំខាន់ ខណៈពេលដែលកម្ពុជាទទួលយកបដិវត្តន៍ឧស្សាហកម្ម ៤.០។

ការសាកល្បងតាំងពីឆ្នាំ ២០១៤ លើសាលាជំនាន់ថ្មី (NGS) របស់កម្ពុជាទទួលបានកេរ្តិ៍ឈ្មោះក្នុងការជំរុញ STEM នៅក្នុងព្រះរាជាណាចក្រកម្ពុជា។ NGS គឺជាកិច្ចសហប្រតិបត្តិការរវាងក្រសួងអប់រំ និងអង្គការសកម្មភាពសម្រាប់ការអប់រំនៅកម្ពុជា (KAPE) និងមានគោលបំណងធ្វើទំនើបកម្មប្រព័ន្ធអប់រំកម្ពុជា។

ចំនួនសាលាជំនាន់ថ្មី NGSs ដែលមានការដាក់បញ្ចូល STEM នៅក្នុងប្រទេសមានមិនច្រើនប៉ុន្មានទេ «លទ្ធភាពទទួលបានការអប់រំ STEM នៅកម្ពុជានៅតែមានកម្រិតនៅឡើយ ដោយសារចំនួនសាលា STEM នៅតែខ្វះខាត»។ នេះបើយោងតាមអ្នកស្រាវជ្រាវ បាន ចាន់ផល្លា។ លោកជាអ្នកសរសេរឯកសារការងារឆ្នាំ ២០២០ ក្រោមចំណងជើង៖ «ស្ថានភាពបច្ចុប្បន្ននៃការអប់រំ STEM របស់កម្ពុជា៖ ករណីសិក្សានៃសាលាជំនាន់ថ្មីព្រះស៊ីសុវត្ថិ »។

dynamic_detail_1

ទោះជាយ៉ាងណាក៏ដោយ នៅក្នុងរាជធានីភ្នំពេញ មានគំនិតផ្តួចផ្តើមកាន់តែច្រើនឡើងពីបុគ្គល អ្នកអប់រំ និងអ្នកជំនាញបច្ចេកវិទ្យា ដើម្បីជំរុញចលនា STEM នេះ។ កម្លាំងជំរុញសំខាន់ទាំងនេះ ជំរុញឱ្យមានកម្រិតថ្មីៗ និងធ្វើឱ្យមានកម្មវិធីសិក្សាដែលទំនើបកាន់តែទូលំទូលាយ។ ដោយសារប្រទេសកម្ពុជានៅតែស្ថិតក្នុងដំណាក់កាលដំបូងនៃការអប់រំ STEM នៅឡើយ។ ដូចនេះ ការបង្កើនចំណាប់អារម្មណ៍ ការលើកកម្ពស់អក្ខរកម្ម និងការកែលម្អធនធានមនុស្សត្រូវការការពាក់ព័ន្ធពីក្រុមចម្រុះ។

អ្នកស្រី ស៊ុយ ចាន់ណេ អ្នកគ្រប់គ្រងប្រចាំតំបន់អាស៊ីអាគ្នេយ៍របស់អង្គការ បច្ចេកវិទ្យា InSTEDD បានដឹកនាំការរៀន STEM ដោយបណ្តុះបណ្តាលគ្រូបង្វឹកក្នុងវិស័យនេះ។ ក្រុមរបស់អ្នកស្រី ក៏បានបញ្ជូនអ្នកអភិវឌ្ឍន៍កម្មវិធី និងអ្នកស្ម័គ្រចិត្តទៅគ្រប់ទិសទី ដើម្បីជួយធ្វើមូលដ្ឋានីយកម្ម Code.org ដែលជាធនធានអនឡាញដ៏ធំបំផុតមួយរបស់ពិភពលោកសម្រាប់សិស្សអាចទទួលបានការរៀនសរសេរកូដ តាមរយៈមេរៀនសរសេរកូដដោយឥតគិតថ្លៃ។ ជាលទ្ធផល ក្រុមការងារកម្ពុជារបស់អ្នកស្រី អាចរចនាកម្មវិធីសិក្សា STEM ក្នុងស្រុកដោយផ្អែកលើ Code.org សម្រាប់សិស្សចាប់ពីថ្នាក់ទី ៧ ដល់ទី ១១ នៅសាលាជំនាន់ថ្មីចំនួនបួន។ Hour of Code របស់កម្មវិធី Code.org គឺជាការរំលឹកប្រចាំឆ្នាំអំពីសារៈសំខាន់នៃការរៀនសរសេរកូដនៅក្នុងប្រទេសដូចជាកម្ពុជា។

Coder ដែលជាស្រ្តីកម្ពុជា

Sisters of Code គឺជាក្លឹបសរសេរកូដដំបូងគេរបស់កម្ពុជាសម្រាប់ស្ត្រី។ បេសកកម្មរបស់វា គឺដើម្បីបង្កើនទំនុកចិត្តក្នុងចំណោមសិស្សស្រី និងចែករំលែកភាពរីករាយនៃការរៀនជំនាញសរសេរកូដ។ បង្កើតឡើងដោយលោកស្រី Natalja Rodionova នាយកគ្រប់គ្រង IT Academy STEP Cambodia។ ក្លឹប Sisters of Code មានបំណងផ្តល់ឱ្យនិស្សិតស្រីឱ្យបានច្រើនតាមដែលអាចធ្វើទៅបាន។ ដើម្បីសម្រេចបានគោលបំណងនេះ សមាជិក ១០០នាក់ បូកបញ្ចូលជាមួយក្លឹបសិក្សាមួយចំនួនទៀត បានពង្រីកវិសាលភាពរបស់ខ្លួនទៅសាលារៀនគោលដៅតាមទីរួមខេត្ត។

dynamic_detail_2

ក្នុងឆ្នាំ ២០១៩ Raintree Cambodia បានចាប់ដៃគូជាមួយ SaturdayKids ដែលជាសាលាសរសេរកូដសម្រាប់កុមារដំបូងគេបង្អស់របស់ប្រទេសសិង្ហបុរី ដើម្បីផ្តល់វគ្គសរសេរកូដប្រកបដោយភាពច្នៃប្រឌិតដោយឥតគិតថ្លៃសម្រាប់សិស្សកម្ពុជាចំនួន ១០០ នាក់។កម្មវិធី Coding Catsបានណែនាំកុមារឱ្យស្គាល់ កម្មវិធី block-based visual programming ហៅថា Scratch ដែលត្រូវបានបង្កើតឡើងដោយ MIT Media Lab ហើយត្រូវបានបកប្រែទៅជាជាង ៧០ ភាសា។

A student from E2STEM presenting his Racing Car project at Coding Cats event

សាលាសរសេរកូដ Phnom Penh/Silicon Valley SabaiCode កំពុងចាប់យកវិធីសាស្រ្តសហគ្រិនភាពកាន់តែច្រើន។ សាលានេះបង្កើតឡើងដោយអ្នកសរសេរកូដពីរនាក់ដែលមានបទពិសោធន៍ជាច្រើនទសវត្សរ៍។ គ្រូបង្វឹករបស់សាលា SabaiCode ជួយយុវជនឱ្យចេះសរសេរកូដ និងសរសេរកម្មវិធី robot។ ក្រុមហ៊ុនក៏មានកិច្ចសហការជាមួយសហគ្រាសធំៗ ដូចជាក្រុមហ៊ុនផ្តល់សេវាកម្មបណ្តាញចល័ត Cellcard ដើម្បីរៀបចំកម្មវិធី Full Stack Developer Bootcamp រយៈពេលមួយឆ្នាំ សម្រាប់សិស្សដែលមានទេពកោសល្យខ្ពស់។

នៅខែវិច្ឆិកា ឆ្នាំ២០១៦ ស្ថានទូតអង់គ្លេសប្រចាំរាជធានីភ្នំពេញបានចេញផ្សាយសៀវភៅ Little Scientists ដំបូងរបស់ខ្លួន។ ទស្សនាវដ្តីមានទាំងភាសាខ្មែរ និងភាសាអង់គ្លេស ដែលមានគោលបំណងផ្តល់ការអប់រំ និងការកម្សាន្តសម្រាប់កុមារអំពីវិស័យ STEM ។

នៅក្នុងពិធីសម្ពោធកម្មវិធី STEM Ambassadors អតីតឯកអគ្គរដ្ឋទូតអង់គ្លេសលោក Bill Longhurst បានថ្លែងថា៖ «វិស័យ STEM មានសារៈសំខាន់សម្រាប់អនាគតរបស់កម្ពុជា វាជាវិធីមួយអាចជួយឱ្យកម្ពុជាបង្កើនផលិតភាពរបស់ខ្លួន ឬសំខាន់ជាងនេះទៅទៀត ដើម្បីអាចឡើងដល់ខ្សែសង្វាក់តម្លៃសកល ដោយអាចបង្កើនកម្រិតប្រាក់ឈ្នួល និងកម្រិតជីវភាពរស់នៅរបស់ប្រជាជនខ្លួន»។ កម្មវិធីនេះ រួមគ្នាជាមួយ IDP Cambodia ដែលជាបណ្តាញរបស់ STEM Ambassadors ដើម្បីណែនាំយុវជនកម្ពុជា និងបំផុសគំនិតពួកគេឱ្យពិចារណាក្នុងការចាប់យកអាជីពក្នុងវិស័យ STEM ។

[ Cambodian Women Take up Technical Roles ]

ក្នុងឱកាសដដែលនោះ រដ្ឋមន្ត្រីក្រសួងអប់រំកម្ពុជា លោក ហង់ ជួនណារ៉ុន បានអំពាវនាវឱ្យសិស្សានុសិស្សងាកមកចាប់អារម្មណ៍លើវិស័យទាំងនេះ រួមទាំងឪពុកម្តាយ និងគ្រូបង្រៀនដើម្បីគាំទ្រពួកគេ។

រដ្ឋមន្ត្រីក្រសួងអប់រំបានសង្កត់ធ្ងន់ថា៖

«STEM បានបង្កើត ពន្យល់ សាងសង់ និងនិវានុវត្តន៍នៅក្នុងពិភពលោកជុំវិញយើង។ កម្ពុជាត្រូវការយុវជនដែលមានជំនាញ និងមានសមត្ថភាពបន្ថែមទៀតក្នុងមុខវិជ្ជាទាំងនេះ ដើម្បីអភិវឌ្ឍធនធានមនុស្ស សេដ្ឋកិច្ច និងជំរុញការអភិវឌ្ឍប្រទេសរបស់យើង។ ប្រទេសរបស់យើងត្រូវការនិស្សិតបញ្ចប់ការសិក្សាផ្នែក STEM ដើម្បីចូលរួមការប្រកួតប្រជែងកាន់តែខ្លាំងនៅក្នុងតំបន់ និងពិភពលោក»។

គំនិតផ្តួចផ្តើមទាំងនេះមានរឿងមួយដូចគ្នាគឺ ដើម្បីបង្កើតវិស័យ STEM មូលដ្ឋានសម្រាប់អ្នកសិក្សាវ័យក្មេងនៅក្នុងប្រទេស។

នៅវិទ្យាល័យព្រះយុគន្ធរ ដែលមានទីតាំងនៅកែងមហាវិថីព្រះសីហនុ និង មហាវិថីព្រះមុនីវង្ស អគារ F បានប្រើប្រាស់កម្មវិធីសិក្សា E2STEM ដែលជាសាលា STEM ដែលបង្កើតឡើងដោយអ្នកស្រីបណ្ឌិត Seet Ai Mee ជាអតីតរដ្ឋមន្ត្រីក្រសួងអប់រំសិង្ហបុរី ។

គិរីផូស បានធ្វើបទសម្ភាសន៍តាមអ៊ីម៉ែលជាមួយគ្រូបង្រៀន Lim Tou Boon (បច្ចុប្បន្ននៅម៉ាឡេស៊ី) ដែលជានាយកកម្មវិធីសិក្សានៅ E2STEM Education ប្រទេសកម្ពុជា។ លោក Lim បានផ្លាស់ទៅរាជធានីភ្នំពេញក្នុងឆ្នាំ ២០១៥ ដើម្បីបន្តបេសកកម្មរបស់ខ្លួនក្នុងការបណ្តុះអ្នកដឹកនាំវ័យក្មេងដើម្បីផ្លាស់ប្តូរសហគមន៍។

មុនពេលផ្លាស់ទី លោកគឺជានាយកមហាវិទ្យាល័យ Taylor ប្រទេសម៉ាឡេស៊ី (២០០៩–២០១៥)។ លោកគឺជាអ្នកជំរុញសំខាន់នៅក្នុងចក្ខុវិស័យរបស់ស្ថាប័ននៃការបណ្តុះនិស្សិតបញ្ចប់ការសិក្សាដែលប្រកបដោយសមិទ្ធផលខ្ពស់ដើម្បីក្លាយជាពលរដ្ឋសកលដែលមានផលិតភាព។ ក្នុងអំឡុងពេលកាន់តំណែង សិស្សរបស់លោក ១០០០នាក់ ទទួលបានការចូលរៀនក្នុង សាកលវិទ្យាល័យកំពូលទាំង ២០០សាលា ទូទាំងពិភពលោកជារៀងរាល់ឆ្នាំ។

លោកជាអ្នកតស៊ូមតិនៃនិវានុវត្តន៍។ លោកប្តេជ្ញាចិត្តក្នុងការបញ្ចេញទេពកោសល្យវ័យក្មេងតាមរយៈវិធីសាស្រ្តសិក្សាផ្អែកលើការចូលរួមដោយសិស្សផ្ទាល់ នៅ E2STEM Education លោកសង្ឃឹមថានឹងឃើញអ្នកជំនាញ STEM កម្ពុជាដែលមានសមត្ថភាពកាន់តែច្រើនជាមួយនឹងជំនាញនៅសតវត្សរ៍ទី២១។

ខណៈពេលដែល E2STEM នឹងបញ្ចប់កម្មវិធីរបស់ខ្លួននៅខែធ្នូ ឆ្នាំ ២០២៣ ខ្ញុំបានសួរលោកគ្រូ Lim អំពីសាលា STEM ដែលគាត់ដំណើរការ និងហេតុអ្វីបានជាការរៀន STEM មានសារៈសំខាន់សម្រាប់និវានុវត្តន៍ជំនាន់ក្រោយរបស់កម្ពុជា។

[បទសម្ភាសន៍នេះត្រូវបានកែសម្រួលដើម្បីកែសម្រួលទំហំអត្ថបទ និងភាពច្បាស់លាស់។]

តើអ្វីទៅជា E2STEM ហើយក្តីសង្ឃឹមផ្ទាល់ខ្លួនរបស់អ្នកដើម្បីសម្រេចបាននៅ E2STEM គឺជាអ្វី?

E2STEM គឺជាគម្រោងវិទ្យាល័យសាធារណៈ ដែលទទួលបានការគាំទ្រ និងផ្តល់មូលនិធិដោយក្រសួងអប់រំ យុវជន និងកីឡា (MoEYS)។ E2STEM ជាអក្សរកាត់ពីពាក្យ English, E-learning, Science, Technology, Engineering & Mathematics (ភាសាអង់គ្លេស, ការរៀនតាមប្រព័ន្ធអ៊ីនធឺណិត, វិទ្យាសាស្រ្ត, បច្ចេកវិទ្យា, វិស្វកម្ម និងគណិតវិទ្យា)។ E2STEM ត្រូវបានបង្កើតឡើងជាកម្មវិធីសាកល្បងដើម្បីបង្កើតអ្នកជំនាញខាង STEM វ័យក្មេងនៅកម្ពុជាដែលត្រៀមខ្លួនជាស្រេចក្នុងបដិវត្តឧស្សាហកម្ម ៤.០។

ភាពជាដៃគូរដ្ឋ-ឯកជន រវាងក្រសួងអប់រំ និង E2STEM Education ដែលជាអង្គការមិនមែនរដ្ឋាភិបាលអន្តរជាតិ ដែលមានមូលដ្ឋាននៅសិង្ហបុរី ត្រូវបានបង្កើតឡើងជាផ្លូវការនៅថ្ងៃទី ៩ ខែមីនា ឆ្នាំ ២០១៧ ហើយ E2STEM Education បានចាប់ផ្តើមជាមួយនឹងការទទួលយកសិស្សថ្នាក់ទី ១០ ជាលើកដំបូងនៅថ្ងៃទី ១ ខែតុលា ឆ្នាំ ២០១៨។

តើអ្វីដែលធ្វើឱ្យអ្នកចាប់ផ្តើមបង្កើតកម្មវិធី E2STEM នៅកម្ពុជា?

E2STEM ត្រូវបានបង្កើតឡើងដោយអ្នកស្រី Seet Ai Mee អតីតរដ្ឋមន្រ្តីក្រសួងអប់រំសិង្ហបុរី។ អ្នកស្រី Seet គឺជា «ស្ត្រីតែម្នាក់» ដែលមានចក្ខុវិស័យគួរឱ្យទាក់ទាញ – ដើម្បីបង្កើតឥទ្ធិពលដ៏យូរអង្វែងដល់ប្រជាជនកម្ពុជាដោយផ្តល់ការអប់រំក្នុងវិស័យ STEM ដ៏ល្អបំផុតដល់សិស្សានុសិស្ស។ កម្ពុជាត្រូវការទេពកោសល្យវ័យក្មេងក្នុងវិស័យ STEM ដែលមានសមត្ថភាពក្នុងជំនាញនៅសតវត្សរ៍ទី ២១ ក្នុងដំណើរឆ្ពោះទៅរកប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០។

E2STEM ប្តេជ្ញាចិត្តគាំទ្រ MoEYS ក្នុងការធ្វើដំណើរមួយនេះ។ ក្នុងឆ្នាំ ២០១៦ ខ្ញុំត្រូវបានណែនាំឱ្យស្គាល់អ្នកស្រី Seet ហើយអ្នកស្រីបានអញ្ជើញខ្ញុំឱ្យចូលរួមជាមួយគាត់ក្នុងការបង្កើតគម្រោងសិក្សា E2STEM។

រៀបរាប់អំពីអ្វីដែលអ្នកធ្វើនៅ E2STEM ។ រឿង ៣ យ៉ាងដែលអ្នកចូលចិត្តធ្វើ? ហើយបញ្ហាប្រឈម ៣ របស់អ្នក?

ការងាររបស់ខ្ញុំនៅ E2STEM គឺជួយដល់ការងាររបស់ប្រធាននាយកដ្ឋាន និងគ្រូបង្រៀនរបស់យើង ក្នុងការគាំទ្រសិស្សានុសិស្ស E2STEM របស់យើងសម្រេចបាន 3Cs ដែលជាលទ្ធផលបញ្ចប់ការសិក្សានៃ E2STEM៖

១. ជំនាញមាតិកា (Content mastery)

២. ជំនាញតួអក្សរ (Character mastery)

៣. ជំនាញសមត្ថភាព (Competency mastery)

យើងធ្វើការលើ 4 Es: environment, education, experience and exposure (បរិស្ថាន ការអប់រំ បទពិសោធន៍ និងការប៉ះពាល់) ដែលសិស្សត្រូវការដើម្បីតាមទាន់ជំនាញនៅសតវត្សរ៍ទី ២១។

ទិដ្ឋភាព ៣ ដែលខ្ញុំចូលចិត្តពេលធ្វើការនៅ E2STEM៖

១. ក្រុមយុវជនកម្ពុជាដែលចែករំលែកចក្ខុវិស័យដូចយើងក្នុងការផ្លាស់ប្តូរការអប់រំនៅកម្ពុជា។

២. ក្រុមនិស្សិតវ័យក្មេងកម្ពុជាដ៏អស្ចារ្យដែលមានឆន្ទៈទទួលយកវិធីសាស្រ្តក្នុងការបង្រៀន និងការរៀនក្នុងសតវត្សរ៍ទី ២១។

៣. ការគាំទ្រដ៏អស្ចារ្យពីឪពុកម្តាយ/អាណាព្យាបាលដែលបានទុកចិត្តផ្ញើអនាគតកូនរបស់ពួកគេឱ្យយើង។

ទិដ្ឋភាពលំបាកទាំង ៣ របស់ខ្ញុំពេលធ្វើការនៅ E2STEM៖

១. ការអភិវឌ្ឍ និងរក្សាវប្បធម៌នៃឧត្តមភាពការងារក្នុងចំណោមសិស្ស។

២. ការផ្លាស់ប្តូរផ្នត់គំនិតពីផ្នត់គំនិតថេរទៅជាផ្នត់គំនិតរីកចម្រើន។

៣. ការធ្វើឱ្យអ្នកពាក់ព័ន្ធទទួលយកតម្លៃនៃសារៈសំខាន់ - រួមចំណែកដល់ភាពជោគជ័យរបស់អ្នកដទៃ។

តើ STEM មានអត្ថប្រយោជន៍អ្វីខ្លះសម្រាប់កម្ពុជា? ហើយហេតុអ្វីបានជាអ្នកគិតថាវាចាំបាច់សម្រាប់យុវជននៅកម្ពុជា?

ដើម្បីឆ្លើយសំណួរខាងលើអំពីអត្ថប្រយោជន៍នៃ STEM សម្រាប់កម្ពុជា ខ្ញុំបានរាយបញ្ជីអត្ថបទជាច្រើន [ខាងក្រោម] អំពីសារៈសំខាន់ និងភាពបន្ទាន់នៃការធានាថានិស្សិតកម្ពុជារបស់យើងស្ថិតនៅជួរមុខនៃឱកាសដ៏អស្ចារ្យនៅចំពោះមុខពួកគេ។

៥០% នៃបុគ្គលិកទាំងអស់នឹងត្រូវរៀនជំនាញរបស់ពួកគេឡើងវិញនៅឆ្នាំ ២០២៥ នៅពេលដែលការចូលរួមរបស់បច្ចេកវិទ្យាកាន់កើនឡើង។ នេះបើយោងតាមរបាយការណ៍អនាគតនៃការងារ របស់ វេទិកាសេដ្ឋកិច្ចពិភពលោក។

ការគិតដោយពិចារណា និងការដោះស្រាយបញ្ហាគឺជាជំនាញស្ថិតក្នុងកំពូលតារាងដែលនិយោជកជឿថា ជំនាញទាំងពីរនេះនឹងរីកចម្រើនក្នុងរយៈពេលប្រាំឆ្នាំខាងមុខ។

ជំនាញដែលទើបលេចឡើងនៅឆ្នាំនេះគឺ ជំនាញក្នុងការគ្រប់គ្រងខ្លួនឯង (self-management) ដូចជាការរៀនសកម្ម ការអត់ធ្មត់នឹងភាពតានតឹង និងការចេះបត់បែន។

ការឆ្លើយតបទៅនឹងការស្ទង់មតិរបស់វេទិកាអនាគតនៃការងារបានប៉ាន់ប្រមាណថាប្រហែល ៤០% នៃអ្នកធ្វើការនឹងតម្រូវឱ្យរៀនជំនាញឡើងវិញរយៈពេលប្រាំមួយខែឬតិចជាងនេះ។

៥០% នៃពួកយើងនឹងត្រូវរៀនជំនាញឡើងវិញក្នុងរយៈពេលប្រាំឆ្នាំខាងមុខ ខណៈដែល «ការរំខានទ្វេដង» នៃផលប៉ះពាល់លើសេដ្ឋកិច្ចរបស់ជំងឺរាតត្បាត និងការកើនឡើងនៃស្វ័យប្រវត្តិកម្មការងារ។

Industry 4.0 Could Have Transformational Impact on Skills and Jobs in Cambodia — ADB Study

សិស្ស E2STEM របស់យើងបានបង្ហាញថាពួកគេមានសមត្ថភាពដូចសិស្សផ្សេងទៀតនៅក្នុងប្រទេសអភិវឌ្ឍន៍ផ្សេងៗ ដរាបណាពួកគេត្រូវបានផ្តល់ឱកាស ធនធាន និងការគាំទ្រដើម្បីទទួលយកបញ្ហាប្រឈមសិក្សាថ្មី។

«សិស្ស E2STEM បានបង្កើត និងបើកដំណើរការ CubeSat (nanosatellite) របស់ខ្លួនដោយជោគជ័យក្នុងខែកញ្ញា ឆ្នាំ ២០២១។»

វាពិតជាចាំបាច់ណាស់ដែលយុវជនកម្ពុជាអាចទទួលបានឱកាសបន្តការអប់រំ STEM ព្រោះវានឹងកាត់បន្ថយការពឹងផ្អែកលើទេពកោសល្យរបស់បរទេសក្នុងការប្រកួតប្រជែងឧស្សាហកម្ម ៤.០ នេះ។

កម្ពុជាអាចក្លាយជាប្រទេសឈានមុខក្នុងការទទួលយក និងនិវានុវត្តន៍ នៃបច្ចេកវិទ្យាឧស្សាហកម្ម ៤.០ ប្រសិនបើយើងផ្តោតលើមូលដ្ឋានគ្រឹះ ដូចជា ការអភិវឌ្ឍចំណេះដឹង ការអភិវឌ្ឍចរិតលក្ខណៈ និងការអភិវឌ្ឍសមត្ថភាព។

ខាងលើនេះគឺជាឧទាហរណ៍នៃជំនាញដែលនឹងត្រូវការយ៉ាងចាំបាច់នាពេលអនាគត។ ការអប់រំគឺមិនត្រឹមតែស្ថិតលើសៀវភៅសិក្សាតែម៉្យាងប៉ុណ្ណោះទេ គឺត្រូវអនុញ្ញាតឱ្យសិស្សានុសិស្សអភិវឌ្ឍជំនាញខាងលើតាមរយៈកម្មវិធីដែលរួមបញ្ចូល ការដោះស្រាយបញ្ហា ការគ្រប់គ្រងខ្លួនឯង ជំនាញអន្តរបុគ្គល ការប្រើប្រាស់ និងការអភិវឌ្ឍបច្ចេកវិទ្យា។

ផ្អែកលើការសង្កេតរបស់អ្នក តើនិស្សិតកម្ពុជាមានចំណុចខ្លាំង និងចំណុចខ្សោយអ្វីខ្លះ ហើយតើពួកគេអាចអភិវឌ្ឍខ្លួនឯងបានដោយរបៀបណា?

និស្សិតកម្ពុជាគឺមានវ័យក្មេង និងស្វាហាប់ ហើយចង់ទទួលយកការរៀនសូត្រ និងការច្នៃប្រឌិតថ្មីៗ។ នៅក្នុងបរិយាកាសសិក្សាដែលលើកកម្ពស់ឱ្យមានការសួរជាសំណួរ និស្សិតកម្ពុជាមានការរីកចម្រើន និងទទួលបានជោគជ័យ។

យើងបានឃើញការផ្លាស់ប្តូរបែបនេះនៅ E2STEM ដែលនៅទីនោះនិស្សិតមិនថាមកពីរាជធានីភ្នំពេញ ឬមកពីបណ្តាខេត្តនោះទេ សុទ្ធតែមានឆន្ទៈក្នុងការទទួលយកគំនិត និងវិធីសាស្រ្តថ្មីៗក្នុងការដោះស្រាយបញ្ហា។ ក្នុងដំណើរសិក្សារបស់ពួកគេ ពួកគេបានផ្លាស់ប្តូរផ្នត់គំនិត និងវប្បធម៌សិក្សារបស់ខ្លួនឱ្យក្លាយទៅជាអ្នកសិក្សាដែលឯករាជ្យ និងរៀនពឹងផ្អែកលើគ្នាទៅវិញទៅមកបានប្រសើរជាងមុន។

ចំណុចខ្សោយ (ឬឱកាសសម្រាប់ការកែលម្អ) ដែលអាចធ្វើការកែលម្អបានគឺ ការផ្លាស់ប្តូរសិស្សពីការរៀនដែលពឹងផ្អែកលើអ្នកដទៃទាំងស្រុង (អាស្រ័យលើគ្រូបង្រៀននិងចម្លើយគំរូដើម្បីរៀនអ្វីមួយ) ទៅជាការរៀនឯករាជ្យនិងពឹងផ្អែកលើគ្នាទៅវិញទៅមក (ការរៀនដោយការសហការរវាងសិស្សនិងសិស្ស)

ការកែលម្អចាប់ផ្តើមជាមួយនឹងការមានឆន្ទៈក្នុងការរៀន និងផ្លាស់ប្តូរ។ បាវចនារបស់ E2STEM គឺ «រៀន ផ្លាស់ប្តូរ និងដឹកនាំ»។ គោលបំណងនៃការរៀនគឺដើម្បីផ្លាស់ប្តូរ - ផ្លាស់ប្តូរខ្លួនឯងជាមុនសិន មុនពេលយើងអាចផ្លាស់ប្តូរអ្នកដទៃ។ បន្ទាប់មកយើងដឹកនាំការផ្លាស់ប្តូរ។

តើអ្វីទៅជាសារៈសំខាន់ដើម្បីរួមចំណែក ឬផ្តល់អត្ថប្រយោជន៍ដល់ប្រព័ន្ធអេកូឡូស៊ី STEM ជាតិរបស់កម្ពុជា?

នៅ E2STEM យើងមាន 4 Es ដែលអាចផ្តល់អត្ថប្រយោជន៍ដល់ប្រព័ន្ធអេកូឡូស៊ី STEM ជាតិរបស់កម្ពុជា។

បរិស្ថាន (Environment)៖ រចនាបរិយាកាសសិក្សាដែលអនុញ្ញាតឱ្យមានការអភិវឌ្ឍលើជំនាញនៅសតវត្សរ៍ទី ២១។ ឧទាហរណ៍នៅ E2STEM ថ្នាក់រៀន និងសាលប្រជុំទាំងអស់គឺមានការបំពាក់ wi-fi ហើយសិស្សទាំងអស់មានសិទ្ធិចូលប្រើឧបករណ៍សិក្សា និងធនធានសម្រាប់រៀនតាមប្រព័ន្ធអ៊ីនធឺណិត។

ការអប់រំ (Education)៖ កម្មវិធីសិក្សាដែល E2STEM បានរចនាគឺផ្តោតលើចំណេះដឹងមាតិកា (យើងប្រើកម្មវិធីសិក្សា និងសៀវភៅរបស់ក្រសួងអប់រំ) ការអភិវឌ្ឍចរិតលក្ខណៈ (យើងប្រើកម្មវិធី Character First) និងជំនាញបច្ចេកវិទ្យា (យើងផ្តោតលើគម្រោង ការរៀនដោយសហការគ្នា ការរៀនផ្អែកលើគម្រោងជាដើម ដើម្បីអភិវឌ្ឍជំនាញបែបនេះ)។

បទពិសោធន៍(Experience)៖ វាជារឿងសំខាន់ក្នុងការរៀនដោយការធ្វើដោយផ្ទាល់ មិនមែនគ្រាន់តែដោយការអានសៀវភៅសិក្សាប៉ុណ្ណោះទេ។ ការធ្វើ អាចមានការបរាជ័យ។ បរាជ័យ ក៏ជាមេរៀនដ៏ល្អមួយ។

ឱកាសចូលរួម(Exposure)៖ ដើម្បីជួយសិស្សរបស់យើងចេះគិតឱ្យជ្រៅជ្រះ យើងត្រូវតែមានចេតនាក្នុងការផ្តល់ឱកាសឱ្យពួកគេបានចូលរួមអ្វីដែលថ្មី។ ការចូលរួមក្នុងការប្រកួតប្រជែង និងគម្រោងអន្តរជាតិបង្កើនល្បឿនដំណើរការនេះ៕