ប្រែសម្រួលជាខេមរភាសាដោយ ចុង ស៊ីវភីង

ពាក់កណ្តាលឆ្នាំ ២០១៨ កញ្ញា គី វិល័យវណ្ណ បានក្លាយជាបុគ្គលិកពេញសិទ្ធិរបស់ក្រុមហ៊ុន Google។ មុនពេលក្លាយជាវិស្វករកុំព្យូទ័ររបស់ Google នៅទីក្រុងសាន់ហ្វ្រាន់ស៊ីស្កូ កញ្ញាបានចំណាយពេលពីរវគ្គជាអ្នកហាត់ការនៅក្រុមហ៊ុនបច្ចេកវិទ្យាលំដាប់សកលមួយនេះ ដែលគ្រប់គ្រងដោយ Alphabet Inc ដោយចាប់ផ្តើមដំបូងជាអ្នកហាត់ការផ្នែកវិស្វកម្មសម្រាប់ Google Ads បង្កើតកម្មវិធី Android នៅទីក្រុងញូវយ៉ក។

មុនពេលធ្វើការជាវិស្វករកុំព្យូទ័រជាមួយ Google Play Commerce Infrastructure កញ្ញាធ្លាប់ធ្វើជាជំនួយការបង្រៀនផ្នែកបញ្ញាសិប្បនិម្មិត (AI) នៅសាកលវិទ្យាល័យលំដាប់ពិភពលោកគឺ Brown University ដែលជាកន្លែងដែលកញ្ញាបានបញ្ចប់ថ្នាក់បរិញ្ញាបត្រផ្នែកវិទ្យាសាស្ត្រកុំព្យូទ័រផងដែរ។

យ៉ាងណាមិញ កញ្ញា វិល័យវណ្ណ ជាជនជាតិខ្មែរមួយរូបក្នុងចំណោមប្រជាជនកម្ពុជាមួយចំនួនប៉ុណ្ណោះដែលបានចូលធ្វើការនៅ Google បានចាប់ផ្តើមជាមួយនឹងរឿងរ៉ាវដែលគាត់ដឹងពីគ្រូវិទ្យាល័យរបស់គាត់។

dynamic_detail_1

គ្រប់យ៉ាងចាប់ផ្តើមនៅពេលកញ្ញាមានអាយុ ១៤ឆ្នាំ ពោលគឺនៅពេលដែលគ្រូបង្រៀនរូបវិទ្យារបស់គាត់បានប្រាប់អ្នកគ្រប់គ្នានៅក្នុងថ្នាក់អំពីអតីតសិស្សពូកែគណិតវិទ្យា និងរូបវិទ្យារបស់គាត់ ដែលទទួលបានអាហារូបករណ៍ទៅសិក្សានៅបរទេស។

Vilayvann at Googleplex. Photo: supplied

កាលពីកញ្ញា គី វិល័យវណ្ណ នៅជាសិស្សវិទ្យាល័យ គ្រូរបស់កញ្ញាគឺជាអ្នកបើកទ្វារឱ្យកញ្ញាបានឃើញពិភពលោកខាងក្រៅ។ កញ្ញាបានស្តាប់អ្វីដែលពួកគាត់និយាយអំពីសិស្សកំពូលៗដែលធ្វើដំណើរទៅក្រៅប្រទេសតាមរយៈអាហារូបករណ៍។

«រឿងរ៉ាវទាំងនេះបានទាក់ចិត្តខ្ញុំយ៉ាងខ្លាំង ដោយសារខ្ញុំចង់មានបទពិសោធន៍រស់នៅជាមួយវប្បធម៌ថ្មីៗក្នុងចំណោមក្រុមមនុស្សផ្សេងៗគ្នា និងប្រឡូកក្នុងបរិយាកាសសិក្សាដែលមានភាពប្រកួតប្រជែង»។

កញ្ញាបានបន្ថែមថា៖ «ដូច្នេះ ខ្ញុំក៏ប្រាថ្នាចង់ក្លាយជាអ្នកដែលទទួលបានអាហារូបករណ៍ទៅបរទេសដែរ។ ខ្ញុំបានដាក់ពាក្យទៅកម្មវិធីអាហារូបករណ៍ភាគច្រើនដែលខ្ញុំរកឃើញ សូម្បីតែកម្មវិធីដែលខ្ញុំមិនមានលក្ខខណ្ឌគ្រប់គ្រាន់ក្នុងការដាក់ពាក្យក៏ដោយ»។

អ្វីដែលយុវជនកម្ពុជាត្រូវត្រៀមខ្លួនសម្រាប់ការងារវិស័យឌីជីថលនាពេលអនាគត

ស្របពេលដែលកញ្ញាគិតថាខ្លួនពុំទាន់មានធាតុផ្សំ និងដំបូន្មានគ្រប់គ្រាន់សម្រាប់ក្មេងជំនាន់ក្រោយរបស់កម្ពុជាក្នុងការរៀបចំខ្លួនសម្រាប់អាជីពនាពេលអនាគតដូចខ្លួន កញ្ញាបាននិយាយថា៖ «ខ្ញុំប្រហែលជាមិនមានចម្លើយល្អសម្រាប់សំណួរនេះទេ។ តែរឿងមួយដែលខ្ញុំចង់សង្កត់ធ្ងន់គឺរៀនពីក្រមសីលធម៌ការងារឱ្យបានល្អ៖ ត្រូវមានសុចរិតភាព ឧស្សាហ៍ព្យាយាម ជឿជាក់ មិនត្អូញត្អែរ និងមិននិយាយដើមក្នុងចំណោមអ្នកដទៃ»។

dynamic_detail_2

កញ្ញាបានកត់សម្គាល់ថា៖ «មិនថាយើងស្ថិតក្នុងសម័យកាលណានោះទេ ការមានក្រមសីលធម៌ការងារល្អតែងតែជាកត្តាសំខាន់ដើម្បីភាពជោគជ័យក្នុងការងារ»។

យ៉ាងណាមិញ កញ្ញា វិល័យវណ្ណ បញ្ជាក់ថា៖ «យុវជនគួរតែរៀនទទួលស្គាល់ថា វាមិនមែនជាបញ្ហាអ្វីនោះទេក្នុងការដែលយើងទទួលបានសញ្ញាបត្រក្នុងវិស័យមួយ ប៉ុន្តែទៅប្រឡូកការងារក្នុងវិស័យផ្សេងទៀត»។

កញ្ញាបានរំឭកថា៖ «ពេលខ្ញុំធំឡើងនៅប្រទេសកម្ពុជា សង្គមហាក់ដូចជាមិនសូវផ្តល់តម្លៃដល់អ្នកដែលមិនបានប្រើសញ្ញាបត្រក្នុងការងាររបស់ខ្លួនទេ»។

សម្រាប់កញ្ញា ការសិក្សាលើមុខវិជ្ជាឯកទេសមួយ ខណៈពេលកំពុងប្រឡូកក្នុងវិស័យការងារមួយផ្សេងទៀត ទាំងក្នុងអាជីព ឬអាជីវកម្ម អាចជាការរួមបញ្ចូលគ្នាដ៏អស្ចារ្យ និងបំពេញបន្ថែមគ្នាទៅវិញទៅមក។

«អ្នកខ្លះត្រូវបានឪពុកម្តាយប្រាប់ឱ្យរៀនច្បាប់ នៅពេលដែលចំណង់ចំណូលចិត្តរបស់ពួកគេស្ថិតនៅក្នុងការធ្វើជំនួញ។ ដូច្នេះវាមិនអីទេក្នុងការចាប់ផ្តើម និងបើកអាជីវកម្ម ធ្វើជំនួញ»។ កញ្ញាយល់ថា សញ្ញាបត្រច្បាប់អាចនឹងមានប្រយោជន៍ ហើយចំណេះដឹងដែលទទួលបានក្នុងសាលាច្បាប់ក៏អាចជួយឱ្យអាជីវកម្មរបស់ពួកគាត់ដំណើរការបានជោគជ័យផងដែរ។

កញ្ញា វិល័យវណ្ណ បានលើកឡើងថា គ្មានអ្វីដែល «ខាតបង់» ដូចដែលសង្គមខ្មែរយើងបង្រៀនយុវជនយើងនោះទេ។

កញ្ញាក៏បានចង្អុលបង្ហាញថា វគ្គបណ្តុះបណ្តាល និងការសិក្សាតាមអនឡាញ គឺជាគន្លឹះក្នុងការជួយយុវជនកម្ពុជា «បង្កើនការងារដែលមិនទាក់ទងនឹងសញ្ញាបត្ររបស់យើង។ អ្វីដែលយើងត្រូវការគឺការមានឆន្ទៈក្នុងការរៀនសូត្រ និងសមត្ថភាពចេះបត់បែនបាន»។

កញ្ញាបានប្រាប់ គិរីផូស តាមរយៈកិច្ចសម្ភាសន៍តាមអ៊ីមែលពី Silicon Valley ថា៖ «នៅ Google ខណៈពេលដែលវិស្វករភាគច្រើនមានសញ្ញាបត្រវិទ្យាសាស្ត្រកុំព្យូទ័រ ខ្ញុំក៏ស្គាល់មនុស្សជាច្រើនដែលសិក្សាផ្នែកសរសៃប្រសាទ ជីវវិទ្យា ស្ថាបត្យកម្ម ឬសេដ្ឋកិច្ច ហើយកំពុងធ្វើការងាររបស់ពួកគេជាវិស្វករកុំព្យូទ័រផងដែរ»។

សារៈសំខាន់នៃការសួរសំណួរ

«ការសួរសំណួរបង្កើនភាពក្លាហាន និងការឱ្យតម្លៃខ្លួនឯងរបស់យើង។ យើងអាចនឹងមិនលើកដៃសួរសំណួរនៅពេលដែលយើងឆ្ងល់ទេ ពីព្រោះយើងខ្មាសអៀន ឬខ្លាចនរណាម្នាក់គិតថាយើងសួរសំណួរឆោតល្ងង់»។ នេះជាការលើកឡើងរបស់វិស្វកររបស់ Google ដែលបានជួយរៀបចំកម្មវិធីផ្លាស់ប្តូរការសិក្សាសម្រាប់និស្សិតសាកលវិទ្យាល័យរបស់កម្ពុជាឱ្យទៅទស្សនា Googleplex នៅទីក្រុង Mountain View ។

«ពេលខ្លះយើងមានមោទនភាពលើខ្លួនឯងពេកទើបមិនហ៊ានចោទសួរ ព្រោះយើងខ្លាចនរណាម្នាក់គិតថាយើងមិនឆ្លាតគ្រប់គ្រាន់។ គំនិតបែបនេះមានហានិភ័យបំផុត។ សរុបមក ការមិនសួរសំណួរគឺកើតចេញពីការភ័យខ្លាច»។

ផ្ទុយទៅវិញ ការរៀនសួរសំណួរបន្ថែមជួយយើងយកឈ្នះការភ័យខ្លាចទាំងនេះ ហើយជាលទ្ធផលធ្វើឱ្យយើងក្លាហានថែមទៀត។ កញ្ញាបានកត់សម្គាល់ថា៖ «ភាពក្លាហានគឺចាំបាច់ណាស់ក្នុងការសម្រេចនូវអ្វីមួយ»។

មិនថាសិស្ស ឬវិស្វករដោះស្រាយបញ្ហានោះទេ «ការសួរសំណួរពង្រីកចំណេះដឹង និងភាពច្នៃប្រឌិតរបស់យើង។ រាល់ចម្លើយល្អៗសម្រាប់សំណួរ នឹងប្រាប់យើងនូវអ្វីដែលយើងមិនដឹង។ វាជួយជម្រះមន្ទិល ឬភាពមិនច្បាស់លាស់ណាមួយ។ វាអាចនាំយើងទៅរកគំនិតថ្មី ឬវាអាចនាំឱ្យមានសំណួរបន្ថែមទៀតដែលជំរុញឱ្យមានគំនិតកាន់តែច្រើន»។

ជារៀងរាល់ថ្ងៃនៅ Google កញ្ញាតែងមានសំណួរជាច្រើននៅពេលធ្វើការងារជាក្រុម។ «សំណួរជួយយើងឱ្យយល់ពីបញ្ហា ដែលជាការចាំបាច់នៅពេលស្វែងរកដំណោះស្រាយ»។

នៅពេល កញ្ញា វិល័យវណ្ណ នៅជាសិស្ស កញ្ញាជម្នះការភ័យខ្លាចក្នុងការលើកដៃក្នុងថ្នាក់ ដោយនិយាយថា៖ «ភាពភ័យខ្លាចនេះកាត់បន្ថយការយល់ដឹងរបស់ខ្ញុំចំពោះមេរៀន និងរារាំងខ្ញុំមិនឱ្យបានរៀនសូត្រច្រើនលើសពីមេរៀន។ [បន្ទាប់ពីជម្នះភាពភ័យខ្លាច] ខ្ញុំកាន់តែមានប្រសិទ្ធភាពក្នុងការងារ និងមានគំនិតកាន់តែច្រើន» នាងបាននិយាយបន្ទាប់ពីរៀនពីរបៀបសួរសំណួរបន្ថែម។

ការប្រឈមនឹងការលំបាក

នៅពេលសាកសួរអំពីការឆ្លងកាត់បញ្ហាប្រឈម កញ្ញាបានប្រាប់ គិរីផូស ថាបើទោះកញ្ញាត្រូវដោះស្រាយបញ្ហាតូចតាច និងបញ្ហាធំៗដោយរបៀបខុសគ្នាក៏ដោយ ក៏កញ្ញាមានវិធីសាស្រ្តមួយចំនួនដែលជួយនាងក្នុងការដោះស្រាយបញ្ហា។

«ជាដំបូង ខ្ញុំធ្វើការអធិស្ឋាន។ ខ្ញុំជឿលើព្រះយេស៊ូគ្រីស្ទ ដូច្នេះខ្ញុំតែងតែប្រាប់ទ្រង់អំពីឧបសគ្គដែលខ្ញុំជួបប្រទះ ហើយខ្ញុំរង់ចាំទ្រង់បង្ហាញខ្ញុំពីរបៀបដោះស្រាយបញ្ហាទាំងនោះ។ ការអធិស្ឋានផ្ដល់ការសម្រាលទុក្ខដល់ខ្ញុំ ធ្វើឱ្យចិត្តខ្ញុំស្ងប់ ដូច្នេះខ្ញុំអាចគិតបានកាន់តែច្បាស់ល្អ»។

កញ្ញា វិល័យវណ្ណ បាននិយាយថាការហែលទឹកក៏ជួយនាងផងដែរ ជាពិសេសនៅពេលដែលបញ្ហាប្រឈមបណ្តាលឱ្យមានភាពតានតឹង។ «ខ្ញុំគិតថា ការហាត់ប្រាណជាទូទៅអាចជួយបាន។ ខ្ញុំបានរកឃើញថា ពេលរាងកាយរបស់ខ្ញុំធន់ហើយ ចិត្តរបស់ខ្ញុំក៏ធន់ដែរ»។

កញ្ញាបាននិយាយថាការនិយាយដោយបើកចំហអំពីបញ្ហាជាមួយនឹងមិត្តជិតស្និទ្ធរបស់នាង អនុញ្ញាតឱ្យនាង «ទទួលបានគំនិតនិងប្រាជ្ញាពីពួកគេដើម្បីជួយដោះស្រាយបញ្ហាប្រឈមទាំងនោះ»។ វិស្វករកុំព្យូទ័ររបស់ Google រូបនេះបានពន្យល់ថា៖ «ខ្ញុំនិយាយជាមួយមិត្តភក្តិ និងក្រុមគ្រួសាររបស់ខ្ញុំ។ ពេលមានអារម្មណ៍ធូរស្រាល ខ្ញុំចែករំលែកជាមួយពួកគេពីបញ្ហាប្រឈមរបស់ខ្ញុំ ហើយតាមរយៈការប្រាប់ដោយផ្ទាល់»។

ផ្តល់ជូនប្រទេសជាតិវិញ និងលើកទឹកចិត្តយុវជនកម្ពុជា

នៅក្នុងបទសម្ភាសន៍កាលពីដើមខែនេះជាមួយ គិរីផូស សាស្ត្រាចារ្យផ្នែកសហគ្រិនភាព Stephen Paterson បានប្រាប់ គិរីផូស អំពីដំណើររបស់កញ្ញា វិល័យវណ្ណ។

«នាងបានសម្រេចចិត្តទៅរៀននៅវិទ្យាល័យអន្តរជាតិមួយនៅប្រទេសន័រវេសរយៈពេលមួយឆ្នាំហើយបន្ទាប់មកនាងបានទទួលអាហារូបករណ៍នៅ Brown [University] ដែលជាសាកលវិទ្យាល័យកំពូលមួយនៅសហរដ្ឋអាម៉េរិក»។

ថ្វីត្បិតមិនមែនមកពីគ្រួសារអ្នកមានស្តុកស្តម្ភ តែនាងបានចូលទៅរៀននៅវិទ្យាល័យមួយនៅន័រវេសរយៈពេលមួយឆ្នាំ។ នេះជាការលើកឡើងរបស់លោក Paterson ក្នុងអំឡុងកិច្ចសម្ភាសន៍រយៈពេលមួយម៉ោង ដោយលោកបានលើកឡើងពីនិស្សិតដែលមានទេពកោសល្យកំពូលៗជាច្រើនមកពីប្រទេសកម្ពុជា ដែលបានចូលរួមការងារ នៅក្នុងក្រុមហ៊ុនពិភពលោក។

ដោយគាត់តែងតែនាំនិស្សិតភ្នំពេញរបស់គាត់នៅសាកលវិទ្យាល័យជាតិគ្រប់គ្រងទៅទស្សនាក្រុមហ៊ុនអន្តរជាតិ គាត់បាននិយាយថា៖ «រយៈពេលបីឆ្នាំចុងក្រោយនេះ រាល់ពេលដែលយើងទៅទីនោះ [Google] គាត់តែងបើកទ្វារឱ្យខ្ញុំទទួលនិស្សិតកម្ពុជាចូលសិក្សាក្នុងក្រុមហ៊ុន»។

ពេលទំនេរ កញ្ញា វិល័យវណ្ណ ក៏ជួយណែនាំសិស្សវិទ្យាល័យ និងមហាវិទ្យាល័យ ដែលកំពុងស្វែងរកអាហារូបករណ៍នៅប្រទេសផ្សេងផងដែរ។ នាកញ្ញារីករាយនឹងការបង្រៀនមួយទល់មួយ និងការអានអត្ថបទនានា។

Horng Jessica ជានិស្សិតសាកលវិទ្យាល័យខ្មែរមួយរូប បានស្គាល់កញ្ញា វិល័យវណ្ណដំបូងតាមអនឡាញ មុនពេលជួបមុខគ្នាផ្ទាល់ និងក្លាយជាអ្នកណែនាំ។ កញ្ញា Jessica បាននិយាយអំពីអ្នកណែនាំរបស់នាងថា៖ «គាត់ផ្ទាល់បានលើកទឹកចិត្តខ្ញុំយ៉ាងច្រើន ហើយបានឱ្យខ្ញុំខិតខំប្រឹងប្រែងបន្ថែមទៀត ទោះបីជាមានឧបសគ្គយ៉ាងណាក៏ដោយ»។

និស្សិតរូបនេះបានកត់សម្គាល់ពីបុគ្គលកម្រូរបស់នាងថា៖ «ការខិតខំប្រឹងប្រែងសិក្សា ទឹកចិត្តដ៏ល្អ និងឥទ្ធិពលរបស់គាត់បានជំរុញទឹកចិត្តយុវជនកម្ពុជាឱ្យទៅសិក្សាផ្នែកវិទ្យាសាស្ត្រកុំព្យូទ័រនៅបរទេស ហើយចង់ធ្វើការនៅ Google ដែរ (សុបិនក្លាយជាការពិត)។ គាត់ជាអ្នកណែនាំ និងជួយខ្ញុំក្នុងការដាក់អាហារូបករណ៍នៅសហរដ្ឋអាម៉េរិក»។

Jessica បាននិយាយថាទៅថ្ងៃអនាគតនាងនឹងជួយអ្នកជំនាន់ក្រោយដូចដែល កញ្ញា វិល័យវណ្ណ ជួយនាង។

«ខ្ញុំរក្សាទំនាក់ទំនងជាមួយពួកគេ ផ្តល់ដំបូន្មានដល់ពួកគេ និងពិនិត្យមើលការសរសេរអត្ថបទរបស់ពួកគេ។ ល។ ខ្ញុំបានចែករំលែកអំពីបទពិសោធន៍របស់ខ្ញុំនៅ Google នៅលើវេទិកាជាច្រើន ហើយបានបើកទូលាយសម្រាប់អ្នកដែលមានអារម្មណ៍ថាបទពិសោធន៍របស់ខ្ញុំនឹងមានប្រយោជន៍សម្រាប់ពួកគេ» នេះជាការលើកឡើងរបស់បុគ្គលិក Google រូបនេះប្រាប់គិរីផូស៕

យុវតីខ្មែរសម្រេចក្តីសុបិនធ្វើការនៅ Google