ប្រែសម្រួលជាខេមរភាសាដោយ វុធ ច័ន្ទតារា

Telegram កំពុងមានប្រជាប្រិយភាពនៅក្នុងប្រទេសកម្ពុជាក្នុងរយៈពេលប៉ុន្មានឆ្នាំចុងក្រោយនេះ។ គិតត្រឹមដើមឆ្នាំ២០២៣ វាបានក្លាយជាកម្មវិធីផ្ញើសារដ៏ពេញនិយមបំផុតនៅក្នុងប្រទេស។

យោងតាម World Population Review គិតត្រឹមដើមឆ្នាំ២០២៣ Telegram មានអ្នកប្រើប្រាស់សកម្មជាង១០លាននាក់ក្នុងប្រទេសកម្ពុជា ខណៈនៅទូទាំងពិភពលោក កម្មវិធីនេះមានអ្នកប្រើប្រាស់ប្រហែល ៧០០លាននាក់។

ហេតុអ្វី Telegram ល្បីខ្លាំងនៅកម្ពុជា?

មានហេតុផលមួយចំនួនដែលធ្វើឱ្យ Telegram មានប្រជាប្រិយភាពខ្លាំងក្នុងប្រទេសកម្ពុជា។ ទី១ កម្មវិធីនេះមានសុវត្ថិភាពណាស់។ សាររបស់ Telegram គឺជាប្រភេទ End-to-End encrypted ដែលមានន័យថា មានតែអ្នកផ្ញើ និងអ្នកទទួលប៉ុណ្ណោះដែលអាចអានវាបាន។ ចំណុចនេះមានសារៈសំខាន់ចំពោះអ្នកប្រើប្រាស់ដែលមានការព្រួយបារម្ភអំពីសុវត្ថិភាពនៃព័ត៌មានផ្ទាល់ខ្លួនរបស់ពួកគេ។

dynamic_detail_1

ទី២ Telegram មានភាពចម្រុះ។ កម្មវិធីនេះអាចឱ្យអ្នកប្រើផ្ញើសារ រូបថត វីដេអូ និងឯកសារ។ វាក៏អាចប្រើដើម្បីបង្កើតក្រុម និងបណ្តាញផងដែរ។ នេះធ្វើឱ្យ Telegram ក្លាយជាឧបករណ៍ដ៏សម្បូរបែបសម្រាប់ការទំនាក់ទំនង ហើយវាអាចត្រូវបានប្រើសម្រាប់គោលបំណងផ្សេងៗ ទាំងផ្ទាល់ខ្លួន និងក្នុងកម្រិតវិជ្ជាជីវៈ។

ទី៣ Telegram ងាយស្រួលប្រើ។ កម្មវិធីនេះមានភាពសាមញ្ញដែលងាយស្រួលយល់ សូម្បីតែសម្រាប់អ្នកដែលមិនស៊ាំនឹងបច្ចេកវិទ្យាក៏អាចងាយស្រួលប្រើ។ នេះធ្វើឱ្យ Telegram ជាជម្រើសដ៏ល្អសម្រាប់មនុស្សគ្រប់វ័យ និងគ្រប់មជ្ឈដ្ឋាន។

តើអ្នកខ្លះកំពុងប្រើ Telegram នៅកម្ពុជា?

កញ្ញា ឈិត សុណងណារី ម្ចាស់ហាងកាហ្វេ Desire បានប្រាប់គិរីផូសថា៖«នៅពេលដែលអតិថិជនរបស់ខ្ញុំសុំលេខទំនាក់ទំនង ខ្ញុំផ្តល់លេខរបស់ខ្ញុំដែលមានក្នុងគណនី Telegram ដើម្បីឱ្យពួកគេអាចទាក់ទងមកខ្ញុំតាមរយៈ Telegram ទោះបីជាលេខទំនាក់ទំនងរបស់យើងមិនមែនមកពីក្រុមហ៊ុនតែមួយក៏ដោយ។ ពេលខ្លះខ្ញុំប្រើ Smart ហើយអតិថិជនខ្ញុំប្រើ Cellcard»។

កញ្ញាបន្ថែមថា៖«ដោយវិធីនេះអតិថិជនរបស់ខ្ញុំអាចបញ្ជាទិញភេសជ្ជៈតាមរយៈសារ Telegram ដោយមិនចាំបាច់បង់ថ្លៃសេវាខលតាមទូរសព្ទឆ្លងប្រព័ន្ធគ្នាឡើយ។

លើសពីនេះ នាងប្រើប្រាស់កម្មវិធី Telegram ក្នុងគោលបំណងសិក្សារៀនសូត្រ ព្រោះការប្រើប្រាស់ Telegram មានភាពងាយស្រួលជាងកម្មវិធីផ្ញើសារផ្សេងទៀត។ នាងបាននិយាយថា៖«ពេលខ្ញុំទទួលឯកសារពីគណនី Telegram ខ្ញុំអាចបើកឯកសារទាំងក្នុងទូរស័ព្ទ និងកុំព្យូទ័រយួរដៃផ្ទាល់ខ្លួន ប៉ុន្តែជាមួយ [Facebook] Messenger ខ្ញុំមិនអាចធ្វើវាដូច Telegramបានទេ»។

dynamic_detail_2

កញ្ញា សេង ស្រីណេង ជាបុគ្គលិកផ្នែករដ្ឋបាលសាធារណៈ និងជានិស្សិតបញ្ចប់ថ្នាក់បរិញ្ញាបត្រជាន់ខ្ពស់នៅសាកលវិទ្យាល័យឯកទេសនៃកម្ពុជា ប្រើប្រាស់ Telegram ច្រើននៅកន្លែងធ្វើការ ដោយសារតែមិត្តរួមការងារភាគច្រើនប្រើប្រាស់កម្មវិធីសម្រាប់ទំនាក់ទំនង។

នាងជឿថាប្រជាជនកម្ពុជាជាច្រើនប្រើកម្មវិធីនេះដោយសារសុវត្ថិភាព និងគុណភាពខ្ពស់របស់វា។ នាងបាននិយាយថា៖«តាមរយៈ Telegram ខ្ញុំអាចផ្ញើឯកសារដែលមានទំហំធំបានយ៉ាងងាយស្រួល ហើយអ្នកទទួលនឹងទទួលបានគុណភាពនៃឯកសារប្រសើរជាងការទទួលវាតាមរយៈកម្មវិធីផ្សេងទៀត»។

Telegram is also popular among businesses and government agencies. Kiripost/Siv Channa

នៅក្នុងប្រទេសកម្ពុជា មន្ត្រីរដ្ឋាភិបាលតម្រូវឱ្យស្កែនរូបភាព និងបំប្លែងឯកសារទៅជាទម្រង់ PDF មុននឹងផ្ញើរវា។ ដូច្នេះគុណភាពនៃឯកសារពិតជាសំខាន់។

យ៉ាងណាមិញ មានករណីដែលគណនី Telegram ត្រូវបានលួចចូល តែសម្រាប់ ស្រីណេង នាងមិនធ្លាប់ជួបប្រទះបញ្ហានេះទេ ព្រោះនាងប្រើ two-factor authentication (មុខងារលេខសម្ងាត់២ដំណាក់កាល)។

នាងបាននិយាយថា៖«ខ្ញុំប្រើមុខងារផ្ទៀងផ្ទាត់ពីរដំណាក់កាលនេះ ដើម្បីធ្វើឱ្យគណនីរបស់ខ្ញុំកាន់តែមានសុវត្ថិភាព។ ជាមួយនឹងមុខងារនេះ ប្រសិនបើជនអនាមិកព្យាយាមចូលគណនីរបស់ខ្ញុំ បុគ្គលនោះត្រូវមានលេខកូដដែលត្រូវផ្ញើទៅកាន់លេខទូរស័ព្ទរបស់ខ្ញុំ»។

គួរជម្រាបថា Telegram ត្រូវបានប្រើប្រាស់ដោយមនុស្សគ្រប់វ័យនិងគ្រប់មជ្ឈដ្ឋានក្នុងប្រទេសកម្ពុជា។ ទោះជាយ៉ាងណាក៏ដោយ កម្មវិធីនេះមានប្រជាប្រិយភាពជាពិសេសក្នុងចំណោមមនុស្សដែលមានអាយុចន្លោះពី ១៨ ទៅ ៤៤ឆ្នាំ ដែលរួមមានស្ទើរតែ ៧០ភាគរយនៃអ្នកប្រើប្រាស់សរុប។ នេះបើយោងតាម Statista ។

Telegram ក៏មានប្រជាប្រិយភាពក្នុងចំណោមអ្នកធ្វើអាជីវកម្ម និងមន្ត្រីរដ្ឋាភិបាលក្នុងប្រទេសកម្ពុជាផងដែរ។ អាជីវកម្មជាច្រើនប្រើប្រាស់ Telegram ដើម្បីទំនាក់ទំនងជាមួយអតិថិជន និងនិយោជិត ខណៈដែលភ្នាក់ងាររដ្ឋាភិបាលប្រើប្រាស់វាដើម្បីចែករំលែកព័ត៌មានជាមួយសាធារណៈជន។

កម្មវិធីនេះផ្តល់នូវមុខងារមួយចំនួនដែលទាក់ទាញអ្នកប្រើប្រាស់នៅកម្ពុជា កត្តារួមទាំងសុវត្ថិភាព ភាពបត់បែន និងភាពងាយស្រួលនៃការប្រើប្រាស់។ លើសពីនេះ Telegram កំពុងបន្ថែមមុខងារថ្មីៗ និងកែលម្អដំណើរការរបស់វា។

យោងតាម Statista ក្រុមអាយុដែលប្រើប្រាស់ Telegram ច្រើនជាងគេនៅទូទាំងពិភពលោកគឺ ពី២៥ទៅ៣៤ឆ្នាំ ដែលមានចំនួន ៣០,៦ភាគរយនៃអ្នកប្រើប្រាស់។ ក្រុមអាយុពី ១៨ទៅ ២៤ ឆ្នាំមានចំនួន ២១,៩ភាគរយ បន្ទាប់មកដោយក្រុមអាយុពី ៣៥ ទៅ ៤៤ឆ្នាំមាន ២១,៣ភាគរយ។ ក្រុមដែលមានអាយុពី ៤៥ ទៅ ៦៤ឆ្នាំមានចំនួន ១៨,៥ ភាគរយ និងរហូតដល់អាយុ១៧ឆ្នាំមាន ៧,៧ ភាគរយ។

កម្មវិធីផ្ញើសារកំពូលចំនួនបួនផ្សេងទៀតនៅក្នុងប្រទេសកម្ពុជាគឺ Facebook Messenger, Line, WhatsApp និង Viber។ ក្នុងនោះ Facebook Messenger មានអ្នកប្រើប្រាស់សកម្មចំនួន ៥,៥លាននាក់ Line ៤,៥លាននាក់ WhatsApp ៤,២លាននាក់ និងViber ៣,៥លាននាក់។ នេះបើផ្អែកលើទិន្នន័យពីគេហទំព័រស្រដៀងគ្នា៕